ബ്ലൂ ട്രൂത്ത്‌സ്

മറയ്ക്കപ്പെടാതെ പോയവ നിമിനേരത്തിനുള്ളില്‍,

ഒപ്പിയെടുത്തവന്‍ പുഞ്ചിരി വിരിയിച്ചു വീരനായ്‌.

മിന്നിമറയുന്ന കൈകാലുകള്‍ക്കുള്ളില്‍ അവനെ,

പുളകിതനാക്കിയത് എന്താകാം?

ബ്രഹ്മാസ്ത്രം പോലവന്‍ തൊടുത്തു പലദിക്കിലായി,

കണ്ടവര്‍ നോക്കിയും കാണിച്ചും അറിയിച്ചും,

മിണ്ടിയും മിണുങ്ങിയും കോരിത്തരിപ്പിച്ചും,

പങ്കുവയ്ക്കപ്പെട്ടവള്‍ പലര്‍ക്കായി.

പിന്നൊരുനാള്‍ യാത്രയില്‍ കയ്യിലിരുന്നിളിച്ചുകാട്ടിയ -

നീലപല്ലുകളവനെ നോക്കി കൊഞ്ഞനം കുത്തി,

മിന്നിമറഞ്ഞ കൈകാലുകളില്‍ അവന്‍ കണ്ട പുളകങ്ങള്‍ക്ക്,

അവന്‍റെ രാത്രികളുടെ നിറവും മണവും.