നീ പെണ്‍കുഞ്ഞ്

തിരിച്ചെത്തുവാന്‍ ആകില്ല,
അറിയാം ഗൃഹാതുരത്വതിന്‍-
സുരക്ഷിത വലയം നിന്‍
ഉള്ളില്‍ മാത്രമാണെന്നു കരുതി ഞാന്‍.
പിച്ചി ചീന്തപെടുന്ന മാംസങ്ങള്‍
വിലപേശുന്ന അമ്മമാര്‍,
സ്വരക്തം മറന്ന താതാക്കള്‍.

തിരിചെത്തുവാന്‍ ആഗ്രഹിച്ചേറ്റവും
സുരക്ഷിതമാം നിന്‍ ഗര്‍ഭ പാത്രത്തില്‍
നീ പെണ്‍കുഞ്ഞ് - സുരക്ഷിതയല്ല
അവിടെയും നീ...

എനിക്ക് നിന്നോട് പറയാനുള്ളത് ;

ഇനിയുമെന്‍റെ ചുമരുകളില്‍ നീ
തത്വചിന്തകള്‍ തേയ്ച്ച് പിടിപ്പിക്കുക,
ഇനിയുമെന്‍റെ കവാടത്തില്‍ നീ
നിരീശ്വരവാദിയായി നിലകൊള്ളുക,
പൂമുഖത്ത് മനുഷ്യസ്നേഹത്തിന്‍റെ-
തിരശീല വലിച്ചു കെട്ടുക,
നിന്‍റെ മുറിക്കുള്ളിലെ ഈശ്വരനും
നേരമ്പോക്കുകളും പുറത്ത്ചാടാതിരിക്കട്ടെ !


എന്ന് സ്വന്തം ഫേസ് ബുക്ക്‌.

യാത്ര

നിന്‍റെ പുറങ്കുപ്പായത്തില്‍ വില്‍ക്കപെടുന്നത്

കപട പ്രണയബന്ധങ്ങള്‍,

നിന്‍റെ നഗ്നമേനിയില്‍ കുത്തിവരയ്ക്കപ്പെടുന്ന,

നിര്‍ജീവ കാമഭ്രാന്തുകള്‍,

നിന്‍റെ അകത്തളങ്ങളില്‍ ദ്രൗപതിയാക്കപെടുന്ന

സ്ത്രീ ജന്മങ്ങള്‍,

എങ്കിലും നീ യാത്ര തുടരുകയാണ്,

ചൂഷണത്തിന്‍റെ ചൂട് മാറാത്ത നിന്‍റെ-

ചായക്കോപ്പയിലെ വിപണന തന്ത്രങ്ങളുമായി.

ചുണ്ടെലിയും പാറ്റയും അപഹരിച്ച

നിന്‍റെ കയറുമെത്തയില്‍ ഉറങ്ങി,

ജീവിതത്തിനും മരണത്തിനും മദ്ധ്യേ നിന്നില്‍

ഇടത്താവളങ്ങള്‍ തേടുന്ന മനുഷ്യ കോമരങ്ങളുമായി

സമാന്തര പാളങ്ങളിലൂടെ,

നീ യാത്ര തുടരുകയാണ്.